اول ما نسمع كلمة طبيعة يجي في بالنا منظر اللون الأخضر بدرجاته الي مانشوف منها الا "المصفر" عندنا وهذا اذا شفناه بعد
ولكن ..
في مكان ما من الاراضي الاسيويه .. الطبيعة ارتدت لوناً أخر !!



هذي الشجرة مو خيال أو رسوم فنان أو تعديل "فوتوشوب ! "
هذي بديع صنع الرحمن سبحانه .. والي تغطي جزء كبير من اراضي شرق آسيا وخص نص .. اليابان
ويسمونها اليابانين " 桜 " وتنطق سـاكورا ومعناها بالعربية أشجار الكرز .. اما ثمار الكرز فأسمها عندهم " ساكورانبو " وتنبت من نوع واحد من هالشجره الي لها اكثر من 20 نوع !



تزرع هذي الشجره في اراضي الدول ذوي العيون الممطه او في قاموس الجغرافيا " اليابان وتمتد لكوريا الجنوبية والصين وغربي الفلبين "
لكن اليابانين معطينها اهتمام خاص جداً لارتباطها بتاريخهم وبحضارتهم وثقافتهم من العصور القديمه

بس في القرن الحديث اصبحت تتواجد هذي الشجره في اكثر من مكان حول العالم والسبب هو ان اليابان جالسة تمشي وتوزع هالساكورا هدايا على العالم .. في عام 1912 أهدت 3000 شجرة كرز للولايات المتحدة كعربون صداقة ودهن سير وتم زراعة هذي الأشجار على احد سواحل واشنطن .. وفي عام 1956 تجددت الهدية بـ 3800 شجرة كرز إضافية ولاتزال هالاشجار موجودة الى وقتنا الحالي في امريكا
وبعد في عام 1959 اهدت اليابان كندا شجر ساكورا وتم زراعتها في الهاي بارك في مدينة تورونتو وفي الجامعه حقتهم .. وبرضوا امتدت الهدايا الى المانيا و بريطانيا وتم تقديمها لهم في مناسبات مختلفه





الساكورا لها الكثير من الانواع المختلفه على حسب شكل الوردة ومدة تفتحها ولون اوراقها وتفاصيل الجذع وقدرتها على تطليع الكرز ..
لكن اكثر الانواع انتشار وجمال وشهره هي الانواع الي ما تثمر .. يعني مجرد زينه تتفتح ازهارها وتعطي منظر بعدين تذبل الزهره وتطيح بدون ماتتكون كرزه !
وغالبا هذي الانواع ماتطول في التفتح مجرد فتره قصيره حول الشهر بتفوات على حسب النوع بعدين ترجع الشجره بلونها الاخضر العادي طول العام


" نوع السومي يوشينو "

النوع المحبب عند اليابانين هو السومي يوشينو somei yoshino والاسم نسبة الى قرية سوميي الي الحين صارت جزء من توشيما في طوكيو .. وتتميز أزهار هذا النوع بانها مايله للون الأبيض مع الوردي الخفيف خصوصاً لما نقرب من الوسط .. وهذي الزهور تتفتح بداية الربيع في فتره بسيطة جدا ما تتعدى الاسبوعين بعد كذا تبدا بالتساقط ..


" نوع الشيداريزاكورا "

وفيه انواع ثانيه مثل شيداريزاكورا shidarezakura يعني " الساكورا الباكية " لان لها فروع وأغصان منحنية للاسفل وكانها شخص حزين منحني يبكي .. وهي تقارب بشكلها لأشجار الصفصاف .. ولكن الفرق ان الساكورا يصير لونها وردي لما تتفتح الازهار اما الصفاف خضرا عاديه ..

وايضاً اليامازاكورا yamazakura " النوع الجبلي من اشجار الكزر " لونه يميل للبنفسجي المزرق واغصانه تنمو بشكل افقي .. وفتره تفتح اوراقه تستمر وقت طويل نسبيا ً حوالي شهر


" الفويوزاكورا "

وفيه الساكورا الشتوية او الـ الفويوزاكورا .. وهي نوع يطلع مميز ولوحده في فصل الخريف ويزهر فتره طويله لما ينتهي الشتاء .. ولكن بشكل متقطع يعني تطلع وتطيح وتطلع مره ثانيه على فترات متقاربه

اما نوع اليايزاكورا yaezakura يمتاز بالازهار الكبيره والسميكه بنفس الوقت ولونه يميل للوردي الغامق







الهانامي في اليابان

زي ماقلنا بأن اليابان تعتبر الساكورا جزء من حضارتها وتاريخها وتولي اشد الاهتمام لموسم تفتح الازهار هذي
فـ تقيم " الهانامي " اللي هو احتفال يسوونه اليابانين عشان يعيشون جمال موسم تفتح ازهار الساكورا في فصل الربيع .. فخلال هالاسبوع الي تتفتح فيه الازهار ويتغطى الشجر باللون الابيض الوردي .. تلاقيهم يطلعون مع اهليهم وبزرانهم ويكشتون تحت هالشجر وياكلون ويسوون احتفالات واستعراضات على حسب كبر المنطقه نفسها واستعدادها لهالاسبوع ..

الهانامي .. ككلمة معناها "منظر الازهار " والمقصود بها طبعاً الاستمتاع بمنظر الساكورا
وهذا الاحتفال اساساً ما كان موجود في اليابان .. بس لما جاء عهدك يا هييان (794–119) صار اليابانين ياخذون العديد من المعتقدات والثقافات من الصين فلطشوا منهم هالاحتفال بمناظر تفتح ازهار البرقوق " نوع من المشمش "

وبما ان اليابانين تعودو يزرعون الساكورا عشان جمال شكلها المؤقت الي يحفز الواحد انه يجلس ينتظرها متى تتفتح فارتبط احتفال الهانامي عندهم بالساكورا .. وصاروا في هذاك الوقت يقيمون الاحتفالات ويجتمعون الساده والنبلاء والامراء تحت اشجار الساكورا ويجون الشعراء من طقة المتنبي عندنا  ويلقون القصائد قدامهم ويجون مغنين وعازفين يسوون عروض .. وكانوا نبلائك يا كيوتو يدهم فارطه ويقدرون هالاشياء و يكبون على المؤدين فلوس فصار العامه يحرصون على الهانامي ويهتمون فيه وكلن يبدع اكثر عشان يغرف قدر اكبر من هالدراهم
لما جاء عهد " ازوتشي " في حكم الشوجون توكوقاوا يوشيموني 1716 الى 1745.. حرص على انه يزيد ويكثف من زراعه الساكورا وخصص مناطق كبيــره جداً لزراعتها عشان يحفز الشعب على الاستمتاع والاحتفال بالهانامي



ومع تطور الوقت تغيرت عادات الاحتفال وانتشرت وتحضرت اكثر وصار اجتماع عائلي من الدرجة الاولى واجتماع للعشاق وبعد للاصدقاء وزملاء العمل .. فتشوف بعض الشركات تعطي فتره بريك من ساعات العمل ويطلعون موظفين المكتب يعيشون اجواء الهانامي سوا فتلاقي تكثر في الحدائق الصغيره تجمعات " salarymen" ببدلهم الرسميه
ومن شدة تطلعهم وانتظارهم لهالموسم .. طلع الـ " ساكورازينسن" وهو الاستعداد للهانامي قبل موسمه باسابيع فـ يتم عرض تواريخ محدده للازهار في كل منطقه من قبل حقون الطقس ..
والناس تبدا تدهر في الاستعدادات وتتبع تفاصيل ومراحل الازهار ويبدون يلعقون الزينه على الاشجار وترتب الحفلات والاستعراضات في الحدائق الكبيرة ..



يبدأ تفتح الساكورا في جزيرة أوكيناوا في شهر فبراير وبالتحديد من منطقة فوكوكا لانها اول منطقة يدخل فيها الربيع ويتجمع اهلها في حديقة قلعة فوكوكا الي تحتوي على حوالي الف شجرة ساكورا .. ويوصل إلى كيوتو وطوكيو في نهاية شهر مارس أو بداية شهر أبريل وبعدين يكمل التفتح رحلته شمال حد مايوصل الى هوكايدو
ووقتت الدولة بداية السنه الدراسية للطلاب والسنه الاقتصادية للدولة في شهر ابريل عشان يصادف عودتهم مع بداية تفتح الازهار في منطقة هونشو وهي اكبر الجزر اليابانيه اللي فيها العاصمة طوكيو ..
فصارت اغلب حفلات الترحيب للموظفين والطلاب تقام مع احتفال الهانامي عشان يبث فيهم روح الحماس والحياه



وحرصت الدوله على ان تكون معظم المدارس والمباني الحكومية في ساحتها الخارجية أشجار ساكورا عشان لما يجي موسم التفتح تصير الدوله كلها لوحة جماليه خرافيه تجذب السياح وتساعد اليابانين على الاسترخاء والاحساس بجمال الطبيعه
" وجه طالب سعودي يصيح بعد اسبوع من الدراسه مايبي يداوم : ( "







بعض النظر عن جمال الساكورا واحتفالهم بالهانامي والاسترخاء والتبطح في هالموسم .. هذي الزهره لها رموز ومعاني في تاريخ وحضارة وديانة اليابان
فهي مرتبطه ارتباط وثيق وقديم ببعض مفاهيم البوذيه مثل المونو نو اوير اللي هي نوع من الطقوس لرثاء الاشياء الزائلة .. عشان تخفف من آلم وحزن زوالها فكانت الساكورا رمز للمونو نو اوير في اليابان عشان سرعة تساقط اوراقها
وبعد اتربطت بارواح مقاتلين الساموراي وجنود الحرب .. وفي اعتقاد اليابانين ان اروح المقاتلين اللي ماتوا في سبيل الدفاع وحماية الوطن .. تتجسد في الساكورا فحياتهم على انها قصيره وماتوا .. الا انها لاتزال رمز جمال متجدد ومخلد طول العمر .. وفيه مثل ياباني يقول : المقاتل كالساكورا فهو الافضل بين الرجال مثلما هي الافضل بين الزهور
وهالمعتقد حرصت الحكومة على غرسه وتجديده في ارواح المقاتلين والشعب في وقت الحرب العالمية الثانية حتى ان الساكورا صارت من اقوى المحفزات الي ترفع معنويات المقاتلين هذاك الوقت .. فكانوا يرسمونها على جوانب طائراتهم الحربية الي تسوي عمليات انتحاريه في الغالب .. كرمز للخلود والاستمرار لان موتهم في سبيل الوطن بيخليهم مخلدين في ذاكرة الشعب ورمز من رموز جمال الحياه بالضبط زي الساكورا ..
برضوا رمزت الساكورا عند اليابانين على الجمال والمتعة المؤقته .. فصارت مجال خصب للتشبيهات في الادب الياباني على مر العصور برضوا ترمز للحب وللفال الزين في الشعر او النثر او الاغاني




ووصلت في العصر الحديث للفن المصور .. سواء انميشن " افلام كرتون " او مسلسلات فهم يحرصون على وجود الساكورا كشئ اساسي .. حتى انهم احيانا في تصوير المسلسلات يربطون مواعيد تصويرهم بموسم تفتح الساكورا عشان يعطي رمز وبصمة يابانيه بحته .. بالضبط زي العبايه في المسلسلات السعودية خخخخ << لاعمرك تشبهين ياشيخه : D